മറ്റ് കമ്പനികളെ മൂലയ്ക്കിരുത്തി അമുൽ; നേടിയെടുത്തത് ലോകത്തിലെ ഏറ്റവും ശക്തമായ ഫുഡ് ബ്രാൻഡ് പദവി

 

ലോകത്തിലെ ഏറ്റവും ശക്തമായ ഫുഡ് ബ്രാൻഡെന്ന പദവി സ്വന്തമാക്കി ക്ഷീരോൽപ്പന്ന വിതരണക്കാരായ അമുൽ. ആഗോള ബ്രാൻഡ് മൂല്യനിർണ്ണയ കൺസൾട്ടൻസിയായ ബ്രാൻഡ് ഫിനാൻസിന്റെ വാർഷിക റിപ്പോർട്ടിലാണ് ഇക്കാര്യം പറയുന്നത്. അമുലിന്റെ ബ്രാൻഡ് മൂല്യം 2023 ൽ നിന്ന് 11 ശതമാനം വർധിച്ചതോടെയാണ് ഈ നേട്ടം കരസ്ഥമാക്കാനായത്. ഏറ്റവും പുതിയ റാങ്കിംഗിൽ 3.3 ബില്യൺ ഡോളറാണ് അമൂലിന്റെ ബ്രാൻഡ് മൂല്യം. തുടർച്ചയായ നാലാം വർഷമാണ് അമൂൽ ഈ നേട്ടം നിലനിർത്തുന്നത്. ഇന്ത്യൻ വെണ്ണ വിപണിയുടെ 85 ശതമാനം വിഹിതവും ചീസിന്റെ 66 ശതമാനം വിപണി വിഹിതവും അമൂലിന്റെ പക്കലാണ് . ഇതാണ് അമൂലിന്റെ പ്രധാന കരുത്ത്. 2022-23 ൽ, അമുൽ അതിന്റെ എക്കാലത്തെയും ഉയർന്ന വിൽപ്പനയായ 72,000 കോടി രൂപ എന്ന നേട്ടം കൈവരിച്ചിരുന്നു. മുൻ വർഷത്തേക്കാൾ 18.5 ശതമാനം ആണ് വർധന.